05:17
Sogn Gerold, confessur. pdf: cheu l’entira historia Ils 19 d’avrel: Sogn Gerold, confessur Sogn Gerold ei avon che daventar eremit staus duca dalla Saxonia. Quella tiara ha el regiu biars onns cun dar …Daplü
Sogn Gerold, confessur.

pdf: cheu l’entira historia Ils 19 d’avrel: Sogn Gerold, confessur
Sogn Gerold ei avon che daventar eremit staus duca dalla Saxonia. Quella tiara ha el regiu biars onns cun dar a tuts bien exempel co viver en tema da Diu. In di eis el vegnius muentaus da Diu da bandunar il mund e sia gloria per anflar sulettamein il reginavel da Diu. El suonda la vusch dil Spért sogn e surdat il guvern da siu ducadi ad in da ses fegls. Cun in asen che porta sia bagascha banduna Gerold zuppadamein sia tiara. El pren avon da viver gest leu en quei liug solitari, nua che siu asen vegni a sefermar. Da Saxonia passa el sur Bregenz a Feldkirch e vinavon tochen a Frisun el Val Drusiana. Egl uaul sper in vegl ruver ei igl asen sefermaus e fatg buca pass pli. Duca Gerold ha capiu quei segn. El construescha cheu ina camona per saver survir a Diu. Il sogn ei ussa semtgaus da cumplenir la voluntad divina. Beinduras vegneva el visitaus, confortaus, instruius e spisgentaus dils aunghels. Biars onns ei Gerold vivius en quei uaul senza che zatgi vessi saviu ch‘in carstgaun vivi cheu. El casti damaneivel da Feldkirch habitava Otto de Jagberg, cont da Werdenberg e Montfort. In di ha quei duca tarmess ora ses catschadurs per far catscha sin in uors. Per puder mitschar dils catschadurs e dils tgauns che devan suenter, ei igl uors seretratgs ella tauna dil ruver, nua che sogn Gerold gest urava. Il sogn eremit retscheiva e protegia quei animal. Cun siu fest catscha el naven ils tgauns e scamonda ad els d’urlar. Mo ils catschadurs che vevan gia engartau igl um ed igl uors, peglian tema, semettan en schanuglias e rogan da perdunar. Ils catschadurs tuornan a casa e raquentan al cont tut quei fatg schabegiau sin catscha. Otto, sia dunna e dus da ses fegls vegnan muentai da quei raschieni e van en Val Drusiana. Leu anflan els il sogn eremit en oraziun. Suenter liung discuors regala il cont ad el ina gronda part dalla val cun uaul e funs. Il sogn baghegia cheu ina pintga claustra che vegn numnada la probstura da sogn Gerold. Igl uors ei adina restaus tier sogn Gerold e surveva ad el per purtar aua, lenna e crappa. Denton ein era ses dus fegls a Saxonia vegni muentai dil Spért sogn da suandar igl exempel dil bab. Pia bandunan els lur patria e semettan sin la tscherca. Suenter ditg encurir anflan els il liug zuppau ed era il bab che urava. Ensemen cul bab surveschan ils dus fegls sulettamein a Diu cun urar, vigliar e passentar il temps en sontgadad. Savens visitavan pelegrins il sogn per seschar instruir e retscheiver buns cussegls. Sogn Gerold ha cheu era retschiert il dun da far miraclas e medegar glieud da biaras malsognas. Il di che sogn Gerold ha sentiu che la fin da sia veta seigi damaneivel, ha el cavau ora zacons tschespets e purtau quels ensemen cun ses dus fegls a Nossadunaun. En la sontga caplutta tschenta el quels tschespets sigl altar da Nossadunna e regala cun quei segn alla Regina dil tschiel sia pintga claustra, ses dus fegls e sesez cun funs, uaul e tut quei ch’el veva. Tala donaziun posseda la claustra da Nossadunaun aunc oz. Cuort sisu ils 19 d’avrel digl onn 978, ei sogn Gerold morts sontgamein en sia cella a Frisun. Ils dus fegls han satrau il bab en la baselgia e lu serendi a Nossadunaun. Els ein entrai en claustra e vivi leu biars onns tenor la regla da sogn Benedetg. Sin la fin da lur veta han els vuliu esser a Frisun. Udalric ei vegnius satraus spel bab. Cuno denton en la caplutta da sogn Antoni a Feldkirch.