Sogn Justin, marter.

pdf: cheu l'entira historia / Sogn Justin, marter
Ils 20 d’october: Sogn Justin, marter
Sogn Justin ei naschius en Frontscha ord buna famiglia catolica. Gia da pign suandava el ils buns exempels da ses geniturs e cun 9 onns ha Diu favorisau il buobet cun specialas grazias e revelaziuns. Tras ina revelaziun sa il bab aschia era spindrar siu fegl vegl ord la sclaveria. Justin cumpogna il bab. Sin via entaupan els in pauper rugadur nius che rugava per almosna. Il bab porscha zatgei vivonda. Justin denton ei buca cuntents mo cun quei e regala al pauper sia giacca. Al bab che marmugna da tala almosna, declara Justin ils gronds merets e citescha la Sontga Scartira che di: quei ch’ins fa ad in pauper per amur da Diu, retscheiva Cristus sez. Plaunet arrivan els tiel flum Isaar, mo anflan ni punt ni barca per traversar quell’aua. Justin consolescha il bab, sefida dalla providientscha divina e di cun spért profetic: Ei vegn prest a vegnir in barcarol speras vi che meina nus a l’autra riva. E daveras cumpara in navatur cun ina barca e seporscha da menar els dus sur il flum vi. Cuntents e consolai arrivan ei aschia ad Amiens tiel patrun dil frar Justinian en sclaveria per cumprar libers el. Ils sclavs vegnan menai avon. Justin che veva mai viu siu frar, mira stagn sin mintgin. El enconuscha il frar, cuora vitier, embratscha e betscha el schend: ti eis miu frar Justinian. Tut surstaus schenghegia il patrun ad els il sclav senza prender daners. Duront il viadi da retuorn auda il guvernatur franzos dils treis cristians che seigien stai en casa tiel patrun dils sclavs. Immediat tarmetta el quater umens a cavagl per pigliar e menar quels avon il tribunal. Entras ina revelaziun divina vesa Justin ils sbiers a vegnend. El camonda al bab da sezuppar cun Justinian en ina tauna. El sez resta sin via, pertgei el desiderava da saver gia ussa dar la veta per amur da Cristus. Curaschusamein stat el ussa cheu avon ils cavaliers che vulan saver nua ch’ils dus auters seigien d’anflar. Il sogn rispunda: Jeu sun Justin, in cristian e damai che vus essas inimitgs dils cristians, vi jeu era buca tradir mes cumpogns. Ils sbiers smanatschan cun la mort, mo Justin rispunda: Jeu temel buca da murir per amur da Cristus. In dils sbiers trai en ravgia la spada e taglia giu il tgau a Justin che veva mo aunc 9 onns. Il sogn tgierp leva en pei cul tgau enta maun e dalla tema scappan tuts tiel guvernatur. Justinian ed il bab vegnan ord la tauna, vesan Justin cul tgau sin maun, crodan per tiara e bragian petramein. Lura secusseglian els nua satrar il tgierp. Cheu entscheiva il tgau a plidar: Satrei mei en quei liug che vegn numnaus Lupera. Miu tgau denton purtei a mia mumma ch’ella hagi per adina in pègn da mia carezia. Sch’ella vegli vegnir tier mei, lu dueigi ella sestentar pil parvis, nua che tuts sogns ruaussien beadamein. Il bab e Justinian satiaran il tgierp sco Justin veva cumandau ed il tgau portan els alla mumma. Lezza betscha quel ed engrazia a Diu ch’el hagi priu si siu car affon denter ils sogns marters. La notg duront che la mumma ura cun larmas sper il tgau da siu dultsch Justin, sclarescha ina glisch la combra, ch’ins veseva la clarezia lunsch entuorn. Igl uestg tarmetta ussa treis spirituals per endriescher il motiv da tala splendur. L’auter di serimna bunamein igl entir marcau sper casa per honorar quella sontga reliquia. En processiun accumpogna il pievel il sogn tgau tier la baselgia gronda. Strusch staus leu satraus, ein pliras miraclas daventadas. Ditg pli tard ein quellas sontgas reliquias entras igl uestg Hartmann da Planaterra, vegnidas purtadas dalla Frontscha egl uestgiu da Cuera tochen a Flumes.