La mumma sper la tgina

En stiva sea meditont
la mumma sper la tgina;
siu egl ruaussa sigl affon,
in tschut cun fatscha fina.
La mumma vul el durmentar,
fa ir la nanna cun cantar:

O Maria,
mumma mia ,
volva po tier nus tiu egl.
Benedida
dai urbida,
muoss'a nus il tiu sogn Fegl!

En tgina biala,il tschut car
balbegia,ri,termaglia;
el vegn fors'a sequietar
pér cur ch'ei vegn stgiraglia.
La mumma betsch'il frunt serein
e conta lu tut ledamein:

O Maria,
tgei legria
has ti giu cun tiu bambin!
Mumma cara
alla tiara has ti dau il vierv Divin.

La glina fa en stiva clar,
gl'affon aunc strusch cupida;
la mumma va per l'enzinnar
cun l'aua benedida
e spetga pazientamein
cantond uss mo bufatgamein:

O regina,
clara glina,
gloriusa en vertit;
dai,beada,
in'egliada,
gid'ils tes tier il salit!

En stiva sesa reflectond
la mumma aunc adina;
il carezau ei dafertond
sedurmentaus en tgina:
"Miu dultsch affon,uss dierma bein,
da di e notg nus Diu ludein!"